Avammut avataaniillu nioqquteqarnermut agguaat

Titartagaq 2.1-imi takutinneqarput avammut avataaniillu nioqquteqarnermut agguaat. Agguaat, tunisat ataatsimut nalingat(BNP) avammut avataaniillu tunisanit agguarneratigut kisinneqartarpoq. Qaffasissusaa Kalaallit Nunaat avammut pisariaqatitsineranut uuttuutaasarpoq. Kalaallit Nunaat illuinnaasiortumik tunisassiorpoq, avataaniilli tunisassianik pisariaqartitsigami avataaniit niueqateqartariaqarluni.

 

1990 tikillugu avammut nioqquteqarnermut agguaat 45 pct. missaaniippoq, kingorna annikilliartorpoq 2015-imilu 18 pct.-imiilluni. Avammut nioqquteqarnermut agguaat annikilliartornerata malitsigaa inuiaqatigiit nioqqutissiornerulernerannik kiisalu Kalaallit Nunaata avammut pingaarnertut tunisassiaa tassaasoq raajat nalikinnerulernerat.

 

Avataaniit nioqquteqarnermi agguaat qaffasinnerpaagami 1985-imi 72 pct.-iuvoq. Tamassuma kingorna agguaat appariartorpoq appasinnerpaagami 2015-imi 30 pct.-iulluni. 1985 tikillugu avataaniit nioqquteqarnerup agguaataata qaffasinnera atortussanik nalilinnik aningaasaliisarsimanerup nunarsuarmilu uuliap akiata qaffakkiartorneranik pissuteqarput. Siullermik 1973-74-imi uuliamik ajornartoortoqarmat ullualuit ingerlaneranni uuliap akuiarneqanngitsup nunarsuarmi akia 100 pct.-inik arlalinnik qaffariarpoq. Uuliamik ajornartoortoqaqqimmat 1970-80-imi akia qaffariaqqippoq. Uuliamik atuineq allanngunngikkaluartoq, nunat uuliamik pisariaqartitsisut uuliasiunngitsullu avataaniit nioqquteqarnerup nalinga allannguuteqarpoq. 1985-ip kingorna avataaniit nioqquteqarnermut agguaatip appariarneranut pingaarnertut pissutaapput suliniutit unikaallatsinneqarnerat aammalu imeruersaatinik tunisassiortoq Nuuk Imeq A/S pilersinneqarnera.

 

Titartagaq 2.1. Kalaallit Nunaanni avammut avataaniillu nioqquteqarnermut agguaataasa ineriartorneri

Najoqqutaq: Naatsorsueqqissaartarfik, kisitsisaataasivik - http://bank.stat.gl/IENBALMND